Sa tuwing sasapit ang kaarawan ko, hindi ko maiwasang makadama ng pagkabalisa. Para akong natutuwa, na natatakot, na nalulungkot na nananabik. Parang katulad lang ng nadarama ko sa tuwing sasapit ang pagtatapos sa paaralan.  Matagal ko nang napapansin iyon, ngunit tulad ng lagi kong ginagawa, pinapabayaan ko na lang na matapos ang buong araw. Lumipas na nga ang dalawang dekada ng buhay ko at laging ganun ang nararamdaman ko.
      Marahil, isa lang iyon sa mga kawirduhan ko. Na minsan, gusto kong mabago at matanggal sa sarili ko. For a better me. Kaya minabuti kong isa-isahin ang mga kawirduhang iyon, at labindalawa pa lang ang pumasok sa kukote ko. Siguro, meron pang iba na di ko napapansin sa sarili ko, ngunit napapansin ng ibang tao. Eto ang mga iyon:
      1. Takot ako sa dugo. Hindi yung tipong takot na makakita ng tumutulong dugo sa isang maliit na sugat. Kaya ko pa yun. Pero yung labis na pag-agos ng dugo, lalo na kung sa katawan ko galing, para akong napaparalisa. Nanlalamig ang katawan ko at nandidilim mga paningin ko.
      2. Hindi kumpleto para sa akin ang fruit salad kapag walang sahog na cheese o cherries. Ugali ko rin na halukayin ang salad para hanapin ang mga iyon.
      3. Hindi ako marunong kumain ng isda ng maayos. Lalo na ng bangus. Kung ang ibang tao ay nakakain na tinik lang ang natitira, marami naman akong nasasayang na laman ng isda.
      4. Mahilig akong mamigay ng mga small gifts, kahit walang okasyon, lalo na kapag malapit sa akin ang tao. Madalas, pinipigilan ko ang sarili ko na gawin iyon dahil baka bigyan ng ibang kahulugan ng binibigyan ko.
       5. Wala akong kahilig-hilig sa outdoor games o sports. Olats lang ako kapag sinusubukan kong sumali sa mga ball games. Kahit na ganun, naipasa ko ang PE sa college na mga recreational games. Para sa akin, isa pa ring misteryo iyon.
      6. Kapag may kinakausap akong tao sa unang pagkakataon, hindi ako tumitingin sa mata niya. Napapansin ko na lang ang sarili ko na lost in thought habang nakatingin sa mga ngipin niya. Oo mga ngipin niya. Hindi ko alam kung may parte ng sarili ko na dentista looking for cavities o likas na mahilig lang ako sa ngipin.
      7. Malaking turn-on sa akin ang babaeng may angst. Yung tipong ill-tempered at maikli lang ang pasensya. Yung out-of-this-world kung magexpress ng pagkabadtrip. Parang female version lang ni Bertong Badtrip.
      8. Wala akong fashion sense, o sabihin na nating nangangailangan ako ng fashion intervention. Kung anong meron akong damit okey na, basta me naisusuot. Hindi rin naman akong mahilig mamili ng damit pamporma.
      9. Kapag naiinis ako sa isang tao, lalo na sa workplace, naiimagine ko ang sarili ko na sinasapak o pinapalo ng dos por dos ang taong kinakainisan ko, lalo na yung mga ipokrito. Pasalamat na lang ako at biniyayaan ako ng mahabang pasensiya at pagpipigil sa sarili.
      10. Hindi ako nakakatulog sa gabi kung wala akong kumot. Di baleng walang unan at tandayan, basta me kumot, solb na ako.
      11. Binubura ko agad ang mga pornographic files sa laptop kapag tapos ko nang mapanood. Hindi kase ako mapakali kapag alam kong me ganun ako computer.
       12. Obsessed ako sa relationship na kung tawagin ay friendship. Masyado akong concern sa mga itinuturing kong malapit na kaibigan at dumadating sa puntong nakikialam na ako sa buhay nila. Sinisikap ko na ring iwasan na magkaganoon, dahil ilang beses na rin akong nawalan ng matalik na kaibigan.
      Kaarawan ko pero nasa pwerto kami para sa loading operation. Ayos lang, matatapos naman ang araw ng di ko napapansin. At hindi rin naman ako mahilig mag-celebrate ng araw ng kapanganakan. Siguro isa rin yun sa mga kawirduhan ko, bilang ako.